ජනාධිපතිවරයා එම ප්රකාශය කළේ ජර්මන් රජයේ ආධාර මත ඉදි කෙරුණ වෘත්තීය පුහුණු මධ්යස්ථානයක් විවෘත කිරීම සඳහා කිලිනොච්චියේ ඊයේ (18) සිදු කළ සංචාරයක දී මහජන හමුවක් අමතමිනි.
උතුරේ ජනතාවට ප්රශ්නයක් පවතින බව
තවදුරටත් අදහස් දැක්වූ ජනාධිපතිවරයා, ශ්රී ලංකාවේ උතුරේ ජනතාවට ප්රශ්නයක් පවතින බව රටේ සියලු දෙනා විසින් පිළිගත යුතු බව අවධාරණය කර සිටියේය.
ජාතීන් අතර සමගිය ඇති කිරීමේ ව්යායාමයේ දී සියලු දෙනා විසින් දැනට පවතින ප්රශ්න ගණනාවක් තේරුම් ගනිමින් ඒවා නිරාකරණය කර ගැනීම සඳහා කටයුතු කිරීමේ අවශ්යතාවයක් පවතින බව හෙතෙම සඳහන් කළේය.
ජාතික සංහිඳියාව ගොඩ නැගීම පිළිබඳ පාඩම ඉගෙන ගන්නා මෙන් තමා අලුත් බලවේගය සැදීමට උත්සාහ ගන්නා පුද්ගලයන්ට කියා සිටින බවත් ජනාධිපති මෛත්රීපාල සිරිසේන මහතා පැවසිය.
යාපනයේ සිසු ගැටුම :
යාපනය විශ්ව විද්යාලයේ සිසු ගැටුම සම්බන්ධයෙන් තමා කනගාටු වන බව අවධාරණය කළ ජනාධිපතිවරයා 'විශ්ව විද්යාල රටේ සංහිඳියාව ගොඩ නගන මධ්යස්ථාන බවට පත් කළ යුතු' බව පෙන්වා දුන්නේය.
රටේ තරුණයන්ට රැකියා ඉල්ලා උද්ඝෝෂණය කිරීමට සිදු වී ඇත්තේ අධ්යාපන ක්රමයේ වරදින් යයි පැවසූ ජනාධිපති මෛත්රීපාල සිරිසේන මහතා, එම තත්වය වෙනස් කිරීමට කටයුතු කරන බව සඳහන් කළේය.
මෙවැනි ගැටුම් වලක්වාලීම සඳහා සංහිඳියාව නමැති විෂය අධ්යාපන නිර්දේශවලටද ඇතුලත් කළ යුතු බවද ජනාධිපතිවරයා කියා සිටියේය.
විධායක ජනාධිපති ක්රමය අහෝසි කරනවා :
විධායක ජනාධිපති ක්රමය අහෝසි කරන බවට දුන් සිය ප්රතිඥාව ඉටු කරන බව සඳහන් කළ ජනාධිපතිවරයා, ඒ අතරවාරයේ 'ඇතැමුන් අලුත් බලවේග හැදීමේ උත්සාහයක නිරත වෙමින් සිටින්නේ කුමන පරමාර්ථයකින් දැයි' ප්රශ්න කර සිටියේ ය.
